Mae anorffenedig yn cyfeirio at natur benagored ein gwaith pensaernïol. Caiff prosiectau myfyrwyr eu datblygu o fewn y cyfnod cyfyngedig sydd ar gael er mwyn sicrhau bod gofynion y cwricwlwm yn cael eu bodloni. Fodd bynnag, yn aml nid yw’r prosiectau wedi’u gorffen ar y pwynt hwnnw, ac yn cynrychioli moment yn nhaith ddysgu’r myfyrwyr. Mae’r sioe’n dathlu’r ffaith y gallai’r prosiectau gael eu hailddatblygu’n barhaus wrth i’r myfyrwyr symud ymlaen ar eu teithiau dysgu ac yn eu gyrfaoedd. 

Wrth guradu arddangosfeydd blaenorol, buom yn archwilio themâu’n canolbwyntio ar broblemau a’r materion oedd yn destun diddordeb i’r prosiectau. Eleni rydym ni wedi esblygu ein dull curadurol er mwyn dathlu’r prosesau pensaernïol a fabwysiadwyd i fynd i’r afael â gwahanol themâu. Yn yr ysbryd hwn, mae teipoleg anghonfensiynol pensaernïaeth – yr anorffenedig – yn amlygu natur benagored cynhyrchu pensaernïol. Mae hyn yn galluogi creu cysylltiadau rhwng prosesau pensaernïol a ddefnyddir i ymdrin ag amrywiol faterion pensaernïol – a thrwy hynny ddangos cyfoeth ymdrechion pensaernïol.

Mewn blynyddoedd blaenorol, buom yn archwilio themâu oedd yn canolbwyntio ar broblemau, ac arweiniodd hynny ni at amrywiol faterion yn ymwneud â chynaladwyedd. Eleni, symudwyd i ffwrdd oddi wrth ein dull cynnwys-benodol gan gyflwyno teipoleg anghonfensiynol, sef yr anorffenedig.

Mae anorffenedig yn symud i ffwrdd o’r caboledig a’r rhagddiffiniedig. Mae’r arddangosfa’n galw am broses guradu anorffenedig sy’n esblygu’n barhaus wrth i ymwelwyr lifo drwy’r gofod. Sefydlwyd y sioe anorffenedig hon fel man cychwyn. Rydym ni’n cyflwyno fframwaith y gellir ei archwilio a’i gwestiynu’n barhaus yn seiliedig ar y gwahanol lensys y mae’r ymwelwyr yn dod gyda nhw.

Rydym yn gosod ein gwaith yn y cyd-destun ehangach trwy’r arddangosfa anorffenedig hon. Un lle’r ydym ni’n datblygu ein gwaith dros amser trwy adborth academyddion, gweithwyr proffesiynol, a’r cyhoedd. Rydym ni’n agor yr arddangosfa i bawb, nid er mwyn canmol ffrwyth y flwyddyn hon ond i ddathlu ein cynnydd wrth i ni symud ymlaen ar ein taith ddysgu. Gwahoddwn chi i ymuno â ni ar y daith. Rydym ni’n agor ein prosesau a’n dulliau pensaernïol i chi gael cynnig eich beirniadaeth. Gobeithio y byddwch yn cymryd rhan yn ein prosesau drwy ryngweithio â’n gwaith.

Mae sioe anorffenedig yn caniatáu defnyddio lensys amrywiol i newid sut y caiff ei chanfod, ei dehongli a’i deall. Rydym ni am ddefnyddio fframwaith anorffenedig ein curadu i ddatblygu senarios cynaliadwy ar gyfer ein cenedlaethau yn y dyfodol. Mae sioe anorffenedig yn ein galluogi i ddechrau deialog gyda chi, dod â chi’n agosach at ein prosesau a chreu’r potensial i chi gymryd rhan yn ein gwaith. Gwahoddwn chi i gymryd rhan yn yr Ŵyl eleni, sy’n rhaglen o ddigwyddiadau dros 5 diwrnod i fyfyrio ar ein prosesau pensaernïaeth gydag academyddion a phobl broffesiynol. Mae’r Sioe Ffisegol wedi datblygu’n ddiwrnod i gloi’r Wyl eleni, er mai dim ond diwrnod arall yn ein taith ddysgu ydyw. Gwahoddwn chi i’n digwyddiadau i rannu eich syniadau a dod yn rhan o’n taith ddysgu. 

Mae ein gwefan wedi dod yn gasgliad o’n dulliau gweithio, ac rydym ni wedi cynllunio amrywiol bosibiliadau ar gyfer llywio drwy’r gwaith. Ar sail adborth gwefan arddangosfa’r flwyddyn flaenorol, cyflwynwn bedwar llwybr llywio: Thema, Cwrs, Myfyrwyr a Lleoliad.  Yn yr un modd, mae’r fframiau a ddefnyddir ar gyfer yr arddangosfa ffisegol wedi’u hadeiladu’n ofalus fel bod modd eu hailddefnyddio a’u haddasu ar gyfer ein sioeau yn y dyfodol. Yn wir, mae anorffenedig yn cynnig cyfleoedd o’r fath i werthuso, myfyrio ac esblygu’n barhaus.