Am yr Ysgol

Sefydlwyd Ysgol Pensaernïaeth Cymru gyntaf ym 1920 a bydd yn dathlu ei chanmlwyddiant yn y flwyddyn academaidd 2021/22.

Dros y blynyddoedd, mae wedi tyfu i gael ei chydnabod fel ysgol bensaernïaeth sy’n arwain y byd ac sy’n gosod agenda. Mae ei chymunedau o fyfyrwyr a staff yn cynnwys unigolion o gefndiroedd cenedlaethol, diwylliannol a phroffesiynol amrywiol. Mae ei chryfderau yn y cyfuniad o draddodiad cryf o addysg bensaernïol, enw da rhyngwladol am ragoriaeth ymchwil, ac ymgysylltiad hirsefydlog â chwestiynau cynaliadwyedd mewn pensaernïaeth a datblygu trefol.

Adeilad Bute yng Nghanolfan Ddinesig hanesyddol Caerdydd yw ei chartref, ac mae’n darparu amgylchedd bywiog a chydweithredol ar gyfer addysgu, dysgu a gwaith ymchwil. Ar draws ei hamrywiol raglenni gradd, mae’n annog myfyrwyr i fynd i’r afael â sefyllfaoedd cymhleth a materion enbyd pensaernïaeth a threfoli yn y byd sydd ohoni gyda deallusrwydd a chreadigrwydd, gan feithrin ymdeimlad o gyfrifoldeb i genedlaethau’r dyfodol.

Enwebeion Gwobrau

Curadu

Gan gamu i’r 2020au, rydym i gyd wedi datblygu dealltwriaeth o’r angen brys i dderbyn ac ymchwilio i bwysigrwydd cynaliadwyedd, yn ogystal ag ehangu ein safbwyntiau a rhoi atebion arloesol ar waith.

Wrth greu dyfodol cynaliadwy ar gyfer y cenedlaethau i ddod, credwn fod angen inni ddod o hyd i gydbwysedd o ran …
…diogelu ein treftadaeth ac adfywio hanes
…dylunio gyda bywyd trefol, ac ar ei gyfer, a chreu lleoedd ac amgylcheddau trefol
…cymhwyso a chofleidio dulliau cyfrifiadurol er mwyn dylunio a chreu
…gweithredu ac ymateb i faterion gwleidyddol cyfoes
…ymateb i argyfwng y newid yn yr hinsawdd

Credwn mewn derbyn camgymeriadau’r gorffennol a dysgu oddi wrthynt. Gallwn addasu; adfywio ein hamgylcheddau presennol mewn ymateb i faterion cyfredol. Gallwn symud ymlaen; dod o hyd i ddulliau arloesol o ddylunio cymdeithasau’r dyfodol.

Byddwch yn gallu archwilio holl waith y myfyrwyr yng nghyd-destun y 5 thema hyn. Ochr yn ochr â’r rhain, gwnaethom ddatblygu ein hashnodau yn seiliedig ar waith y myfyrwyr a lanlwythwyd i ddangos yr amrywiaeth eang o ddulliau a ddefnyddiwyd i edrych ar gynaliadwyedd. Gallwch ddatgelu hanes eglwys sydd wedi’i hanghofio, ymuno â’r henoed sydd angen aros mewn cartrefi gofal, archwilio’r posibiliadau o gadw dŵr. Neu gallwch hyd yn oed gamu y tu mewn i dŵr wedi’i adeiladu o ddeunyddiau wedi’u hailwampio neu fod yn rhan o ymgyrch sy’n codi ymwybyddiaeth o gydraddoldeb hiliol.

Hoffem ni, y myfyrwyr yn Ysgol Pensaernïaeth Cymru, eich gwahodd i archwilio ein canfyddiadau beirniadol a chreadigol a’n hymatebion i argyfyngau ein hoes.